يوميات مدرس

[color=green]علشان ما حدش يزعل مني ويقول ان أنا ما بخشش على المنتدى كتير أنا هابدأ اخش أهوه بس أنا عاوز ردود على المواضيع اللي أنا باكتبها وأنا إن شاء الله هاكتب أكتر وأكتر بس على شرط ألاقي إيجابية من الاعضاء . ماشي يا رجالة[/color]

بالنسية للقصة : هي للفكاهة والمتعة والبسمة الرقيقة التي تصور جانب من جوانب حياة المدرس الذي يسعى دائماً نحو السراب ظناً منه أن تللك هي الحقيقة .

اقرأو وادعو لي .


جرس المنبه يدق , يستيقط الأستاذ حمدى . يمد يده ويلتقط المنبه من جواره وينظر فيه


- لسه بدرى
يعود للنوم مرة أخرى ثم يقوم منتفضا على صوت زوجته توقظه
- خضيتينى ياشيخه . هى الساعه كام دلوقت , إيه سبعه إلا ربع يانهار أسود . سبتيني ليه كل ده , ده أنا عندى إشراف عام النهارده . ولسه حأتوضا وأصلى . والعربية بتتصلح ولسه لما ألاقى مشروع والا تاكس , منك لله , إيه بتقولى إيه أخده عارضه , لا كله إلا ده ماينفعش , آه حقى لكن الأستاذ عبده مبيقبلش عارضه من اللى مكلف بإشراف أو يوم عمل , إيه عاوزه كام ؟ ليه ؟ هو أنا ماهيتى بعد الكادر بإذن الله قد إيه ؟ وأهو على إيدك قاعد جنبك كل يوم خلاص مفيش طلبة بتدخل علمى كلهم أدبى , أنا واقف بارغى معاكى و أنا متأخر . السلام عليكم .

ينزل حمدى إلى الشارع ويحاول أن يجد مواصلة للذهاب إلى العمل

- محطة مصر . تاكسى , المحطة , المحطة , تاكس , المحطة , كويس فيه مكان فى المشروع ده الحمد لله , حاسب ياعم بتزق ليه على الصبح , أنا جيت جنبك ياست , خدنى جنبك يا أخ ربنا يكرمك , أنت يا أستاذ أنت يا أخ أنت ياللى بتدخن خلاص يعنى , لأ ما أنتش حر , طفى السيجارة لو سمحت , والنبى ياأسطى شغل شريط قرآن ولاحاجة تانية غير الشريط ده اللى إنت مصدعنا بيه , ده مين ده اللى بيغنى ده إسمه إيه ؟ ده مبيض نحاس واللا إيه ؟

يدخل حمدى المدرسه مسرعا

- صباح الخير يا أستاد ممدوح , صباح الخير ياأحمد ياصلاح ايه فيه متابعة ! على الصبح كده ! هو كل يوم , الله هم الجماعة دول مافيش وراهم حد غيرنا , ما يروحوا ياأخى المدراس اللى جنبنا اللى مفيش فيها طالب من أول السنه , الإمضاء جوه عند الريس ماشى , ربنا يستر .
- صباح الخير يا ريس , لا والله يا ريس , الناموسيه لونها لا كحلى ولا بمبى حتى . ده أنا ما عرفتش أنام من ضرسى طول الليل , شكرا ياريس .

يتجه حمدى إلى حجرة القسم

- صباح الخير ياحاج مرجان , صباح الفل يا محمد يا عمر , إزيك النهارده ياجروانى , أهلا ياأبو على , القهوه ياشيخ .

يأخذ حمدى أوراقه ويتجه الى الفصل ويحيى بعض الزملاء فى طريقه

-صباح الخير إزيك ياأستاذ ميشيل , إجتماع مجلس إدارة ؟ ماشى , صباح الخير يا أستاذ عادل إجتماع جماعة التطوير فى المكتبة ؟ حاضر, على فكره أنا عملت عرض باور بوينت للطلبه , ياريت تجيب الأستاذ عبده والأستاذ السيد منصور الحصه دى .

- صباح الفل ياأستاذ عيسوى ماشى حآجى القهوه أشرب معاك حجر معسل , صباح الخير يا سمير ياشوقى إية أخبارك متزعلش منى أنا وعرفة وشمس عشان غلبناك فى الطاولة ,خلى حسين الزيات ينفعك , جوهرى إيه ياسيدى أخبار ال 50% بتاعت الكادر؟ لسه شويه , ربنا موجود , أستاذ محفوظ فين يا عم كارنيهات النقابة الجديدة , برضه لسه شويه , إيه الحكاية أنتو متفقين مع بعض والا أيه !

يدخل حمدى الفصل

- السلام عليكم يا اولاد , شكرا اتفضلوا اقعدو ,النهارده 10يناير 2008 عنوان الدرس حساب عمر الصخر , أحسن تيجى المتابعة تلاقينى بأشرح الدرس وناسى التاريخ والعنوان تبقى مشكلة , مش عارف الشكليات والروتين ده ماله متأصل عندنا , على فكره يا أخوانا فيه متابعة فى المدرسة وعاوزين شكلنا يكون كويس , كل واحد يطلع كشكول الحصة عشان أفوت أصححها بسرعة , ايه يابنى دى كراسة دى ؟ دى كام صفحة ؟ عشرين صفحة , لأ دى ماتنفعش إبتدائى حتى , وفين الغلاف بتاعها , الله يخرب بيتك , ايه اللى كاتبه عليها متبصليش بعين رضيه !! هو أنت سواق تاكس واللى بتبيع كشرى , وأنت يا زفت ماجتش الدرس امبارح ليه أختك ولدت , مبروك ياسيدى ماتنساش الحمص , وفلوس الدرس عليك شهرين لأ ياحبيبى تدفع الحصه اللى جاية , وانت يا زفت مش قلت حتيجى الدرس معاك اتنين صحابك , أيوه اللى عند المدرس اياه , عاوز ايه تروح الحمام هو إحنا فى إبتدائى مش عارف تمسك نفسك , أنزل , آلو أيوه لأ معقول , الوليه إتجننت والا إيه , ده لبس تلبسه واحده فى سنها ومركزها , لأ وبتصلى ورجليها عريانه ! بقولك إيه أنا فى الحصة دلوقت لما أخلصها حأكلمك , ايه الجرس ضرب , طيب يا أولاد نشرح الدرس الحصة اللى جايه .

يخرج حمدى من الفصل ويتجه إلى حجرة أخرى

- صباح الخير ياأستاذه فدوى آه لحقت التوقيع الحمد لله , إزيك ياسيد يا خريطه أنا مش عارف يا أخى أنت بتيجى بدرى قوى إزاى أوعى تكون بتبات هنا , إزيك ياأستاذه سامية إيه النيو لوك ده ؟ ده ياستى دفتر التحضير وده درس النهارده وده سجل الإشراف , شكرا , حاضر يا أستاذه سعاد حاأكتب تدريب شهر يناير , أيوه ياأستاذه ناديه دفاتر المكتب ؟ حاضر , أزيك يا أستاذه زينب , آه النهارده حنعمل بروفة بس يارب يكون خالد موجود النهارده , اية غايب ؟ بقى عنده 27 يوم عارضه , ماله خالد ده ؟ الشئون القانونيه كلها معندهاش شغل اللى هو, الأستاذ عبده قال له أنت تروح الشئون القانونية وقول لهم أنا خالد عثمان حيعملوا عليك طابور ولا طابور العيش , أنا إتأخرت عن الإجتماع .

يتجه إلى مكان آخر

- السلام عليكم أيوه يا عادل يا لبيب أنا جهزت ملف المتعلم وعملت قاعدة بيانات للطالب , والله مش عارف يا إبراهيم ياشمس إيه الحكاية إحناالعرب كنا بتوع كلام وبقينا دلوقت ظاهرة كلامية وورقية , على رأيك أيام الوزير إياه كان لازم كل مدرسة تكتب على جدرانها مدرستى جمبلة ونظيفة ومتطورة وضافو لها ومنتجة مش عارف بتنتج إيه بالظبط ؟ وعمل كمان الكتلة الحرجة , وفجأة لقينا التطويروحجم الفجوة وإتساع الفجوة وفجأة كل ده إتلغى وجت الجودة , لأ وشوف الإبداع مجلس الآباء ينقلب إلى مجلس الأمناء , ده فكر واضح وراه أمريكا , وهى أمريكا ييجى من وراها خير , مش أمريكا اللى بتدور على حقوق الشواذ , وبتصدر لنا العرى فى الفضائيات , وإيه أخبار الكادر ؟ لازم إمتحان تربوى ولغة عربية ومادة التخصص ! بعد ماشاب ودوه الكتاب , ده إحنا بقينا عضمة كبيرة وعندنا زهيمر( على رأي صديقي دودي ) , دول المفروض يلمونا وبدل مايودونا الأكاديمية يودونا دار المسنين , على رأيك بلاش نتكلم فى الكادر والجودة ,الكلام ده يجيب المرض . نضحك أحسن ما نعيا ؟ نضحك , نضحك , نضحك على إيه ؟ مش لاقيين حاجه تخلى الضحكه تطلع من القلب مجلجله زى زمان لما كنا نضحك لحد ما عنينا تدمع وجنبنا يوجعنا من الضحك , فيه إيه فى البلد يضحك ؟ على رأيك ده كل أحوال البلد تضحك , أيوه بس ضحك مر , كل حاجه فى البلد أتقلبت موازينها وإختلت , ياراجل ده حتى مش عارفين نرصف طريق , ده الكورنيش بعد ما إتسفلت عند المحروسة لقوه عالى عن نص الطريق التانى , ولا الخصخصة و المصانع اللى إتباعت , ولا سعر الحديد والأسمنت اللى خلى سعر الشقق يولع ,
بنتك وإبنى وإبنك حيتجوزوا إزاى ؟ ولا الشباب طاقة مصر ومستقبلها المعطلة ,اللى مترصصين فى المولات والقهاوى والسيبرات , ولا أسعار المواد الغذائية اللى بتزيد كذا مره فى اليوم ! تخيل إن الحشيش هو الحاجه الوحيده اللى رخصت , ولا الطوابير اللى المصرى بيقضى فيها نص عمره , من طابورالبطاقة الجديده لطابور إضافة المواليد لبطاقة التموين , والروتين والموظفين اللى بيتفننوا فى تعذيب الناس , ولا المصيبة الجديده طابور العيش ! شوف الكارثة ده المفروض إن مصر دولة زراعية وصناعية بإمارة إيه ؟ المصانع اللى اتباعت وإتهدت وعملوا مكانها أبراج سكنيه ومولات , والا المنتجات الزراعية اللى فيها مبيدات مسرطنه , ولا القمح اللى مش مكفينا ناكل , وبتقول اضحك ! إزاى يا شمس , برضه أضحك , أضحك أحسن أموت , حاضر حأضحك أهه , أدينى بأضحك , أنا بأضحك أهه أهه , و أنتو كمان أضحكوا أضحكوا كمان ، أضحكو كمان وكمان , أضحكوا على نفسكو, أضحكو أكتر أضحكوا أعلى أضحكوا أضحكوأضحكو قبل الضحك ما يغلى أضحكو

يضحك بشكل هستيرى وينقلب إلى البكاء ,

مستني الردود والتعليقات
د/ وليد

دول بيضحكوا علشان ميعيطوش ربنا معاكوا

مع مين بالضبط يا عبدو

مع المدرسين ولا مع أبطال القصة

يا ريت يا عبدو تكتب تعليق ينفع للقصة مش بس مجرد كلمات تاخد بها مشاركات وخلاص[b]

مع مين بالضبط يا عبدو

مع المدرسين ولا مع أبطال القصة

يا ريت يا عبدو تكتب تعليق ينفع للقصة مش بس مجرد كلمات تاخد بها مشاركات وخلاص[b]

مع مين بالضبط يا عبدو

مع المدرسين ولا مع أبطال القصة

يا ريت يا عبدو تكتب تعليق ينفع للقصة مش بس مجرد كلمات تاخد بها مشاركات وخلاص[b]

انا برضه الى عايز اعل مشاركات ولا شفتنى بكرر الرد اكتر من مرة وبعدين انا مش لاقى رد الا كده

معلش يا استاذ وليد هو بصراحة مفيش رد غير كده فعلا
لاساتذة غلبانه بالذات الاساتذة الكبيرة فى السن بيتعبوا فعلا و محتاجين بر فعلا
أنا عندى استاذ(الاستاذ عصام) كان بيدينى عربى و حساب و أنا فى أولى و تانية ابتدائى كل ماأعدى عليه أسلم عليه بحرارة لحاد مابقى كل ما يشوفنى يضحك و فى مرة سمعته بيتكلم عنى و بيقول أنى منسيتهوش و أنه فرحان بيه
و الكلام ده فرحنى جدا عشان على الأقل خففت عنه شوية من متاعبه و همومه و أديت جزء من جميله عليا
و أنا بوصى كل طالب هنا أنه مينساش أهم حاجة فى حياته اللى هو يعتبر معلمك أصول كل حاجة

هههههههههههههههههههههههههههههههههههههه


ودى مساندة منى لكل المدرسين

ده لو كان فعلا مدرس يستاهل

ياساااااااااااااااااااااااااتر
مالك ياعبدو
انا بدأت اتخنق

ايه انا عملت ايه بس ؟ انا بقول رايى مش اكتر

ايه يا عم عايزين تشجيع مش كده يعنى أنت محسسنا أن الاساتذة كلهم وحشين
لا حول ولا قوة الا بالله
حرام عليك يا ابنى أنت بهدلت المدرسين
و لا أنت عندك عقدة نفسية منهم
المهم هو فعلا لو كان يستاهل
بس مكانش فى لزمة تقولها يعنى

على العموم شكرا على مرورك
ههههههههههه

يعنى لو هى صح حرام اقولها ؟

لا بس الكلمة الطيبة صدقة
مش لازم تقول رأيك فى كل حاجة ممكن رأيك ده يعمل مشاكل
و بعدين أنت ممكن تكذب أو تستعمل ذكاءك عشان تحبب اللى أدامك فيك و لو حبك ممكن تصلحه

لا طبعا الكذب مش طريقة

محدش قال حرام
بس تخيل ياعوبد"لا قدر الله يعنى"
لو زنقك التنسيق ودخلت كلية اداب والا تربية
وأصبحت رغم انف سياتك مدرس



اولا : هل تعتقد انك تقدر تكون مدرس مثالى مع كل الطلبة؟
ثانيا: ماذا تفعل لوظلمت احد تلامذتك دون ان تقصد؟
ثالثا : كيف تجعل من كل تلامذتك عباقرة ومؤدبين فى نفس الوقت؟
رابعا:قوللى ازاى تقدر تتحكم فى 50طالب امامك فى حصة واحدة وكل واحد بشخصية مختلفة
ازاى هتقدر توصل المعلومة بالشكل اللى انت عاوزة فى وقت محدد ولكل الطلبة
وازاى تقدر تجعلهم مستمعين بكل اذان صاغية
يعنى ترمى الابرة فى الفصل ترن
بس فى نفس الوقت بشكل مثالى ومحترم

خامسا: لسة عندى ليك اسئلة تانية

ياريت تجاوب وبصراحة
وبدون اجابات تهربية

اولا : هل تعتقد انك تقدر تكون مدرس مثالى مع كل الطلبة؟
بالتاكيد لا بس على الاقل احاول ومعملش الحاجة الى الكل بيلمنىعليها
ثانيا: ماذا تفعل لوظلمت احد تلامذتك دون ان تقصد؟
انا اعرف مدرسين بيعتذروا للطالب وده مش عيب
ثالثا : كيف تجعل من كل تلامذتك عباقرة ومؤدبين فى نفس الوقت؟
بالتاكيد مش هقدر بس في حاجة اسمها الشخصية القوية وفى عندنا مدرسين بالفصل الناس حبت المادة علشان خاطرالاستاذ والعكس صحيح
رابعا:قوللى ازاى تقدر تتحكم فى 50طالب امامك فى حصة واحدة وكل واحد بشخصية مختلفة
الاجابة من فوق
ازاى هتقدر توصل المعلومة بالشكل اللى انت عاوزة فى وقت محدد ولكل الطلبة
والله دى حاجة على حسب قدرة الاستيعاب ومش فى ايد المدرس بس هو برضه مفروض يمل الى عليه
وازاى تقدر تجعلهم مستمعين بكل اذان صاغية
يعنى ترمى الابرة فى الفصل ترن
بس فى نفس الوقت بشكل مثالى ومحترم
انا جاوبتها

ايه ده ايه ده كتوكوت مسلوخ ايه يا استاذنا انا جاوبت على كل الاسئلة ومستنىرد الاخ دودى

ايوه كتكوت مسلوخ
شفت أنت كل شوية عمال تلوم الاساتذة و لما الأخ دودى وجهلك أسأله كويسة جدا و أنت جاوبت بحاجات أنت مكذبتش بس أنت قلت حاجات لو أنت حاليا مدرس هيلومك عليا طالب زيك حاليا برده

انا مش فاهم ردك
وبعدين انا جاوبت على الاسئلة بصراحة ايه باه كتوكوت دى

يعنى أنت بتلوم الاساتذة على حاجات أنت لو كنت مدرس كنت هتعملها يعنى الشتائم كان غصب عنك هتشتم و لو مرة بس هتشتم و هكذا بأه

أما الكتكوت لما بيتسلخ بيبقى شكله مضحك و غريب هكذا أنت و أنت هكذا و نحن لها

بس شكله حلو قوى
هههههههههههههههههههه