موضوع: خواطر على المقهى السياسي الثلاثاء أكتوبر 21, 2008 6:24 am
جلس كشكوش افندى وبشبوش افندى على قهوة ام كلثوم بجانب منزلهما وجلسا يلعبان الطاولة ليلا على أنغامها الهادئة مما يذكرك بايام السبيعنات وان اوحى مظهرهما بذلك ، بدا بشبوش افندى سائلا : عرفت ايه اخر اخبار الازمة المالية دى ؟
رد كشكوش افندى مجيبا : يا عم أزمة مين ، شفت أنت محاكمة هشام طلعت اولت امبارح ؟ دى الدنيا مقلوبة عليها.
اجاب كشكوش افندى : انا عارف على ايه بس ، وبعدين كلنا عارفين لو الحكومة عايزة تطلعه هاتطلعه ، من امتى يعنى الحكومة ما ( بيتعرفش ) ؟
تلفت بشبوش افندى حوله واجابه متوترا : يا عم الله يخليك خلينا ناكل عيش .. ما انا عارف ثورجتك دى هاتودينا ورا الشمس .
رد كشكوش افندى مجيبا : يا ريت هو احنا لاقيين العيش ..
واستطرد قائلا : وبعدين زمن الخوف راح وانتهى خلاص ، انت ما بتشفش العيال بتوع الفيس بوك عاميلن ايه ..
رد بشبوش افندى قائلا : ابقى قولهم كده .. لما تلاقى نفسك قالع هدومك ومتعلق من رجليك ساعتها هاتقولهم يا يعيش يا يعيش ..
قهقه كشكوش افندى ضاحكا : انا عارفك طول عمرك بتخاف تقول رايك .. يا راجل احنا قاعدين مع بعض فيه ايه ..
رد كشكوش افندى : انا سمعت ان الرئيس عامل اجتماع طارىء لمجلس الوزارء لبحث قضية سوزان تميم ..
جذ بشبوش على اسنانه قائلا : بردك ما فيش فايدة ، العب عشان انا واخذ اذن من مراتى ساعة وحضرتك ضيعتها فى السياسة اللى هاتكل دماغك ديه ، يعنى انت هاتغير ايه والنبى ...
اجابه كشكوش : انت عارف احنا ممكن نغير كثير ، أولت امبارح شفت اعلان حلو قوى عن جرنان جديد طالع ، اسمه اليوم السابع ، شفت الاعلان بتاعه ؟؟
رد بشبوش قائلا : ايوه الواد اللى بيزق الاتوبيس ده ..
ضحك كشكوش مجيبا : يا ابنى افهم بقى ، ده رمز حاطينه مصورين بيه حال البلد ، وعمرها ما هتتقدم طول ما اللى زيك خايف يقول رايه كده .. البت المخرجة ساندرا دى حكايه ..فى دقيقتين صورت حال البلد كلها .
فجاة امتدت يد صغيرة مربته على يد بشبوش افندى قائلة : بابا بابا ماما عايزاك فى البيت ..
التفت بشبوش لابنته الصغيرة مجيبا : طيب بقولك ..وتحسس جيب معطفه واخرج ربع جنيه ومد اليها يده قائلا : خذى الربع جنيه ده وقولى لامك انا ما لقتش بابا ..
اجابته ابنته الصغيرة واضعة يدها حول وسطها : نعم يا اخويا ربع جنيه ايه ، ده كيس الشيبسى بقى بجنيه ..
الثلاثاء أكتوبر 21, 2008 6:24 am
