هاسألك سؤال بس تجاوب بصراحة لما يجى على ذهنك عيد الأضحى إيه أول حاجة بتفكر فيها ؟
خلى بالك إحنا إتفقنا إنك تجاوب بصراحة
واحد هيقول الخروف والتانى اللحمة والثالث البهجة وغيره الراحة من الشغل ........
طيب , إحنا كدا مش بنفكر صح .... معلش أنا لازم أتكلم بصراحة بردو ...
أول شئ تفتكره هو سيدنا إبراهيم
تخييل معايا أب قعد ما خلفش لغاية ماكبر وخلاص حس إنه مش هايخلف خالص جاب ولد ... ياترى هايحب إبنه أد إيه ؟؟؟ طب تخيل إن الولد كبر شويه وبقه 11 سنة مثلا أبوه هايتعلق بيه ازاى ؟؟ طيب لو قلنا للأب ده خد 100 مليون جنيه واكسرلو دراعه ... ياترى هايرضى ؟ طبعا لأ
تخيل بأه إن الله أمر سيدنا إبراهيم بأنه يدبح إبنه و بإديه ! يعنى لم يأمره الله تعالى بمفارقه إبنه ولا حتى بقتله بأى طريقة بدس السم مثلا وبعدين يصحى الصبح يدفنه .... لا ده يجيب سكينة ويذبح إبنه بنفسه ...... فما كان من سيدنا إبراهيم وابنه إسماعيل إلا أنهما إمتثلا لأمر الله تعالى وخلاص الولد سلم رقبته لأبيه .... والأب فى يده السكينة و هايذبح .... فداه الله بذبح عظيم
إبراهيم إمام الناس كلهم مسلمين ويهود ونصارى
قمة التوحيد وقمة العبادة لله ضربها لنا سيدنا إبراهيم وسيدنا إسماعيل علشان حاجات كثيرة .. منها تعليم الناس كلهم مسلمين ويهود ونصارى مثال عملى واقعى لعبادة الله وتوحيده
يا تري هتبقا زيه ؟
طيب , لما ربنا يؤمرك بالصلاة على وقتها هاتنفذ الأوامر اللى جايالك ولا لأ ؟؟؟
لما يقولك جل جلاله دى حرام إياك تعملها هاتنفذ الأوامر دى وتحاول تبقى زى سيدنا إبراهيم ولا مش هاتنفذ ؟
أمرك غريب بصراحة ... ده ربنا أمرك بحاجات سهلة تعملها ومقلكش ادبح ابنك ... يا تري ايه الأسهل ؟؟
كلها أمور سهلة تعملها وحاجات حرام تسيبها وبس
بعد الكلام اللي قلناه يا تري الخروف دلوقتى بيفكرك بأيه ؟
كل سنة وإنت طيب
كل سنة وإنت طيب و عايزك العيد ده تفتكر سيدنا إبراهيم و تحاول تقلده وتقول ..... يارب أنت أحب إلى من نفسى وأهلى وأصحابى أمرتنى وأنا عبدك المطيع ... هانفذ أى حاجة تؤمرنى بيها .... يارب اهدنى صراطك المستقيم .. وأعنى على ذكرك وشكرك وحسن عبادتك .....
مع تحياتي
د/ وليد الجوهري
الأحد ديسمبر 07, 2008 5:43 pm
