[b]سلسلة (أفكار للحوار) الفكرة الأولى :المؤهل الاحتياطى[/b]

الفكرة الأولى : المؤهل الإحتياطى
يعني بدل ما الوحد يكون معاه بكالوريوس أو ليسانس ..لأ .. يكون معاه اتنين فى وقت واحد.. ويستلم الشهادتين فى وقت واحد .. بحيث لو ما اشتغلش بالأول (الحكومى) يشتغل بالتانى (الاحتياطى) .. بمعنى آخر كل واحدمننا يا جماعة يعمل لنفسه مجال شغل احتياطى .. يعنى إيه شغل احتياطى .. يعنى بجانب المؤهل بتاعه (الحكومى) يكون معاه مجال تانى غيره يقدر يشتغل بيه ويكون ملم بكل حاجه فيه .. زى ما يكون درسه مع الليانس بالضبط.

مثال فى قصة واقعية لتوضيح الفكرة
حمدىخريج كلية تجارة شعبة محاسبة (مؤهله الحكومى) يعنى وظيفته محاسب .. ومع ذلك فالراجل دارس ومتعلم برنامج الرسم الهندسى (AutoCAD) وواخد فيه كورسات معتمدة (مؤهله الاحتياطى) .. والمحاسب الكبيرمالقاش شغل محاسبين ..طبعا عارفين ليه ؟ .. أصل يا عينى ما عهوش واسطة كبيرة..فبسررعه أصحابه حجزولو مكان ع (مصطبة الخريجين) جنبهم .. أصلها بقت بالحجز دلوقتى من كتر الطلب عليها..المهم حمدى كان أذكى منهم .. لأن معاه مؤهل احتياطى (AutoCAD) وراح اشتغل بيه فى شركة مقاولات كبيرة فى القاهرة .. وبعدها بشوية سافر السعودية وشغال هناك زى الفل بمرتب زى الفل وبعدها اتجوز وعايش حياته زى الفل .. وسلمنى على المحاسبة!!
بس خد بالك ...
أوعى (تهمل) للمؤهل الحكومى و(تعتمد) ع الاحتياطى بس .. لأ .. طبعا ..التركيز يكون على الجانبين وإن تعارض واحد مع التانى .. المؤهل الحكومى ليه الأولويه .. مش من أهميته أوى يعنى ... لأ .. لأنه ما فيهوش خيارت كتيرة .. إنماالتانى فيه خيارات مرن أكتر.

طيب المطلوب إيه ؟!!
فى المؤهل الأساسى (الحكومى)
محتاج لتلات أو أربع حاجات - فى ايامنا دى- . وهم
1 –تقدير محترم (طبعا ماتقوليش مقبول)
2 – لغةأجنبية تانية (انجليزى - والألمانى قادم فى السوق بقوة كمان)
3 – ملم بالمهارات الأساسية للكمبيوتر (ICDL)
4 –شوية خبرة فى مجال الشغل حتى ولو مش كتير (على الأقل تكون عارف إن الدراسة الأكاديمية شىء والتطبيقية شىء مختلف )

وبالنسبة للمؤهل الاحتياطى ..
ينقسم إلى :
1 – مهارة تنميها (زى الخط – التصميم – البرمجة – كتابة سريعة على الكى بورد ....)
2 – حرفة تتعلمها (صنعة يعنى) من صنايعى قديم (سباكة – نقاشة - نجارة – خياطة .....)
3 – أعمال حرة (تجارة يعنى) وطبعا دى للناس اللى معاهم فلوس (ممكن يفتح مشروع مكوة –مكتبة – بقالة – يربى أرانب – عيش غراب – ضفادع ... أيوه ضفادع انت ليه مستغرب ..هاقولك بعدين ....)

والمؤهل الإحتياطى يحتاج إلى :
1 – الإهتمام بالموضوع وحمله على محمل الجدية .. يعنى مش مجرد كلام وخلاص .. لأ .. حط ليه خطة زمنية ومكانية ودراسة جدوى زى الكلية بالضبط.
2 – الإلمام التام بالمجال اللى أنا خلاص نويت عليه.
3 – التخصص فى شىء معين بحيث ينفع يكون بكالوريس (يعنى ما ينفعش آخد بكالوريس فى الأعمال الحرفيه .. لأ طبعا .. يبفع تاخد بكالوريس نجارة قسم باب وشباك بس ... إيه هوا طمع وخلاص !!!).
4 –لازمن يا صحبى تكون مشهور فى الوسط بتاعك يعنى المبرمج يكون معروف بين المبرمجين.. لأن ده أكل عيش وأكل العيش يحب الخفيه.
5 –الشهادة برضوا شىء مهم .... لأننا فى بلد الشهادات
6 –الاحتياطى يكون ملازم للأساسى .. يعنى ظبط نفسك على استلام الشهادتين فى نفس الوقت.. شهادة الحكومة عشان تبروزها ببرواز ابكلاش محترم وتحوطها فى الصالون والتانية شهادةالاحتياطى عشان الظروف (الحلوة) فى البلد دى.

مميزات المؤهل الاحتياطى عن مؤهل الحكومة
1 –مافيهوش (مكتب تنسيق) يحدفك فى أى مكان وخلاص زى الكورة الكًفًر..لأ دا انتا اللى بتختار المجال بنفسك.
2 –مرن فى الوقت (براحتك خالص)
3 – يحسسك بكيانك وإنك راجل شغال ومحترم فى بلد نصها عواطليه ومتسكحين
4 –أمان .. أمان .. من الفقر وتضييع الوقت بعد الكلية عشان أدور على شغل.

طيب نبدأ ازاى ؟
1- حدد مجال مؤهلك الاحتياطى (حددته ..برافوا عليك)
2- شوف ناس من أصحابك يشتركوا معاك ..عشان ما تملش (ابعد عن الناس المحبّيطين واللى بياكوا النافوخ ويزنوا ع الدماغ ...)
3 –ياللا دور على مكان تاخد فيه دورات لغة .. أو كمبيوتر .. على حسب ما حددت مجالك
4 –فين كتبك وسيديهاتك اللى هاتتعلم منها ؟؟.
5–اللى خد قراره بتعلم أحد برامج الكمبيوتر أو أحد لغات البرمجة يشترك بسرعة فىمنتدى أو اتنين على النت فى نفس المجال بحيث يعرف كل جديد.
6 –اللى يا عينى زى حالاتى كده ماعهوش فلوس يشتغل فى الصيف ويدّرب فى أيام الدراسة
7 – صاحب ناس معاك فى نفس المجال (طبعا الناس الحلوة بس)

مشاكل.. مشاكل .. مشاكل
إيه ياعم التفاؤل اللى انتا فيه ده؟.. انتا مش عايش معانا ولا إيه؟.. ياحلاوة بقى الموضوع بالسهولة دى؟.. يا عم اقعدلنا فى حتة كده؟..كل ده وأكتر هيقابلك وهايعوقك فى تنفيذ فكرتك وحصولك على الليانس الاحتياطى بتاعك.. يعنى الدنيا لونها مش هايكون(بنبى) معاك زى ما هو مكتوب كده ... فى الحالة دى الواحد يكون مرن.. إيه.. مرننننننننن.. ويكافح ويثابر لحد ما يوصل للى هواعاوزه.. وكمان بعض المشكلات هاتقبلك زى :

ما عيش فلوس : يا سيدى اعمل جمعية – اعتبر نفسك معاكش موبايل (وشغلك هوا موبايلك) واصرف على التدريب زى ما بتصرف عليه كده.. حتى لو بعت الموبايل بتاعك أبو كامرا وجبت واحد موتوريلا يمشى الحال وخلاص لحد ما تفرج ..دى حاجة حلوة خالص
– اشتغل فى الصيف وادرب فى أيام الدراسة.
مفش فاضى من الدراسة وما عنديش وقت : خصوصا فى الكليات العملية ..على فكرة دى مش مشكلة خالص ، لو الواحد نظم وقته ممكن يعمل اللى هوا عاوزه – ممكن يدرب طول السنة وبلا شهر الامتحانات خالص.. يا سيدى شهرين .. ولا تزعل نفسك تلات شهور .. يعنى كل ترم تلات شهور يبقى معاك فى السنة ست شهور – وبعدين ازاى يعنى ماتتصرف مع إن المؤهل ده مهم أوى أوى.
اوعى الغلطة دى !!
معظم شباب الجامعات فى إجازة نصف وآخر السنة بيسافروا للشغل فى أى مكان.. أكتوبر.. القاهرة..الشرم.. المهم إنه يشتغل ويجيب فلوس.. ده عظيم جدا.. ولكن.. كل القصه لو يوجه شغله فى اتجاه معين بحيث يكسب بيه الوقت.. يعنى بدل ما يروح يشتغل فى مطعم كشرى فى السيدة .. لأ .. يشتغل ورا نقاش أحسن .. اه .. منها يجيب فلوس وكمان يتعلم الصنعة اللى هاتكتب فى شهادة البكالوريس (الاحتياطى)..
يعنى: (لالشغل الأجرة وتمشيه الحال .. نعم لشغل الصنعة ولو بقليل المال)

يا ويلك لو ما عملتش كده
(ها تتحدف للخطط البديلة.... )
احتمال واحد : هاتندم بعد الكلية وتروح تشتغل فى أى مكان والسلام... لأنك محتاج لمصاريف.. واللى جاى يا عينى على قد اللى رايح.. أو تدور على فيزا للسعودية ..وتبيع اللى وراك واللى قدامك.. دا إن كان فى حاجة أصلا تتباع.. وبعد كده يا صابت يا خابت .. وتلف تلف.. تلف..وفى النهاية البيت هو اللى يجوزك (طبعا بعد سن الثلاثين)
احتمال اتنين: تضطر تنفذ الخطة دى وتدور من جديد على المؤهل الاحتياطى .. ويضيع منك الوقت والجهد وحاجات تانى كتير .. هاقولها قدام شوية.
احتمال تلاتة: تلعب معاك البلية وتلاقى واسطة كبيرة تشغلك فى مكان حلو .. وتروح تلاقيه (كل) عليك القرشين بتوعك.. وقالك العب بعيد يا شاطر انا ما أعرفكش..(فى أرض الواقع)

ليه الباكالويوسين مع بعض ؟
عشان بعد ما تخلص كلية (البكالوريوس الأول) هاتكون:
1 –زهقت من التعليم.
2 –نظرة المجتمع ليك تتغير خصوصا لو قعدت فى البيت من غير شغل فتجبر يامسكين تشتغل فى أى حاجة وخلاص حتى من غير تفكير.
3 – وانتا فى الكلية المصاريف على البيت .. والعكس (المفروض) بعدما تخلص.
4 –توفير الوقت بعد الكلية.. زى ما حصل مع خالتى.. هاقولها قدام شوية.
5 – سهولة السكن عن بعد التخرج خصوصا لطلابة الأرياف.
6 –الاحساس بالمسؤلية مبكرا مما يخليك (عضمك ناشف) بعد الكلية وفاهم الدنيا ماشيةازاى.
7 – فى فرص كتيرة للطلبة فى التعليم خصوصا فى مجال الكمبيوتر واللغات مش متوفرة لغيرهم زى الخصومات للطلبة..

نصيحة
التخصص.. التخصص .. التخصص .. بس كدا

نصيحة
قطرات المياة تذيب الصخور لا بقوتها ولكن بتواصل السقوط


حكايات لهيا العبر

(1)- مش عاوزك تكون زى خالتى
هى خريجةهندسة اتصالات حديثا بتقدير جيد جداً .. وعند التخرج فرحت فرحاً شديا وكانت تظن أنشركات الإتصالات ستتسابق فى طابور طويل (عريض) أمام كلية الهندسة منتظرين خروجالمهندسة الكبيرة للتعاقد معها.. ولكن هذاللأسف لم يحدث .. قالت فى نفسها :"عادى.. يمكن لسا ما عرفوش إنى اتخرجت،وبعدين فيها إيه يعنى لما أروحلهم أنا بنفسى" .. فعلاً لم تتوانى فى البحث عن شركات تتناسب ومؤهلها التخصصى..وهى تظن انهم عاملين مفاجأة ومنتظريها قدام باب الشركة .. ولكن للأسف هذا لم يحدث أيضاً .. فقد رُدتمن كل الشركات وذلك لتلات حاجات أساسية بجوار التقدير ناقصها عنها... (س)... طيب تعلم إيه المسكينة ؟..
طبعااتجهت يا عينى للخطط البديلة ..(س) ..
وقبلما تتم السنة .. اتجوزت يا خسارة .. يا ميت ألف خسارة .. كان نفسى تكمل المأساة 

(2)- ضبدعجى قدير ومقتدر
قابل الأستاذالدكتور إبراهيم زنونى ع الطريق السريع وهو رايح المنيا الساعة 2 بالليل شاب (على وش جواز) كده ومعاه (كلوب)... فوقفوقاله: "انا رايح المنيا تركب معايا أوصلك عشان مفيش دلوقتى مواصلات ؟".. قاله: "متشكرين يا بيه"..قاله الدكتور: "يا عم اركب هاتروح فين دلوقتى فى الساعة المتأخرة دى؟" ..قالوا:"يابيه.. بس أنا معايا ضفادع !!".. ضحكت الدكتور وقاله: "اركب.. اركب.. ولومعاك عفاريت حتى" ... فلما ركب الشاب علت أصوت الضفادع بنغمات (جميلة) مصحوبةبرائحة أيضا (جميلة).. فقال له الدكتور: "انتا معاك ضفادع بجد ؟".. قالهصاحبنا :"ما قلتلك بلاش يا بيه !!!!!!".. ضحك الدكتور وسأله : "انتابتعمل إيه بالضفادع دى؟".. فقال له الشاب مفتخرا رافعا رأسه حتى كادت أن تخرجمن عربية الدكتور (الفيات) الهلكانة : "يا بيه أنا خريج معهد خدمة اجتماعيةومن بحرى شغال أنا واخويا اللى معاه برضهمؤهل عالى شغالين فى الضفادع من زمان.. واخدين شقة فى المنيا وعاملين فيها أوضةكبيرة حمام للضفادع.. وبيجى واحد من القاهرة بياخد الكيلو مننا ب 60 جنية.."رشف الدكتور ريقه كما ترشفون أنتم الآن وسأله نفس السؤال الى تودون تسألوه أيضا: "وانتا بتعمل كام كيلو فىاليوم بالصلاة ع النبى ؟".. قاله ما شاء الله (بلدكم مليانة ضفادع :) والواحدبيعمل حوالى 80 كيلو فى اليوم...................".
لاتعليق ..........................

خدمات لكل الأعضاء
ـ فىكتاب فى تعلم المحادثة الانجليزية خطير أوى نصحنى بيه (د. مصطفى صادق) مدرس الأدب الانجليزى بالجامعة الأمريكية .. وهو
"Learning Conversation for all Levels and Traveler " ..تعلم المحادثة الإنجليزية لكل المستويات وللمسافرين.. لأديب بسادة .. أربع أجزاءبـ 60 جنية هتلاقوه فى الفجالة بالقاهرة.

دعوة
اللى عنده أى حاجة زى كده يا ريت يكتبها فى تعليقات المقال .. وبكده ممكن نكون أفدنا بعض بطريقة عملية أكتر

الأسئلة
(أجب عن الأسئلة الآتية على أن يكون الخمس أسئلة الأولىاجبارى والباقى اختيارى)
س 1 /اذكر الأشياء الثلاثة الناقصة عند خالتى على أن تكون اللغة الانجليزية واحده منهم ؟س 2 / اذكر ما هى (رقم ) الخطة البدليةالتى انتقلت إليها خالتى مع العلم أنها لم تبحث عن فيزا للخارج ؟
س 3 / برأيك فيما تستخدم هذه الضفادع ؟
س 4 /ما رأيك فى الفكرة ، وهل قدمت ليك جديد .. ولا صفحات ع الفاضى ... بأمانة ...؟
س 5/أسلوب الكتابة .. هل هو مناسب .. أم لا .. وما هو المناسب ؟

ملحوظة : كل الأمثلة المذكورة فى المقال هى قصص واقعية عاصرتها بنفسى

يا ريت المدير يثبت لي الحلقات بتاعتي ويبطل شغل الكوسة دي

لشمعنى يعني السلسة بتاعتة مثبتة

وكمان مقال العضوة Miss wounds

حرام عليكوا بقى


انتظروني في الجزء الثاني

هو لسه فى تانى مش لما قرا الاول الاول

:king:

miss wounds كتب:

سيادة العضو / The bad boyأتمنى تقرأ الموضوع بهدوء الاول
ونعطى كل شئ حقه

وأعتقد إن الموضوع ده يفيد كثير من الشباب
وإنت أولهم

بس أعتقد برضة إنك من الناس اللى بيمتلكوا موهبة
ياريت بقة تستغلها وتحدد أهدافك وتشوف إنت عاوز توصل فين فى الحياة

أنا مش فاهم انتى مديقه منى ليه مش فاهم انا كلمتك اقبل كده

أو قلت حاجه ضيقتك

the bad boy كتب:

miss wounds كتب:

سيادة العضو / The bad boyأتمنى تقرأ الموضوع بهدوء الاول
ونعطى كل شئ حقه

وأعتقد إن الموضوع ده يفيد كثير من الشباب
وإنت أولهم

بس أعتقد برضة إنك من الناس اللى بيمتلكوا موهبة
ياريت بقة تستغلها وتحدد أهدافك وتشوف إنت عاوز توصل فين فى الحياة

أنا مش فاهم انتى مديقه منى ليه مش فاهم انا كلمتك اقبل كده

أو قلت حاجه ضيقتك

يا حودة يا حبيبي احنا هنا كلنا بنفيد بعض و بنستفيد و اعتقد ان أفضل صديق اللى يدلك على عيب فيك و يحاول يخليك تقلع عنه و يدلك على أحسن حاجة فيك و ينميها فيك
هى ماغلطتش لما نصحتك اعتقد انها مصيبة جدا و انت خلاص دخلت ثانوى يعنى تعديت من الحياة مراحل و اقتربت من أكبر مراحل الحياة بعد الجواز و بعد الشغل و هى الكلية انت كمان 3 سنين هتحدد مصيرك و مسار حياتك في السنين الباقية كلها
المفروض تشكرها

س 1 /اذكر الأشياء الثلاثة الناقصة عند خالتى على أن تكون اللغة الانجليزية واحده منهم ؟

اعتقد ان عبدو جاوب قبلى :- الانجليزى - مهارات الكمبيوتر - شوية خبرة

س 2 / اذكر ما هى (رقم ) الخطة البدليةالتى انتقلت إليها خالتى مع العلم أنها لم تبحث عن فيزا للخارج ؟

اعتقد ان مش هى اللى قالها عبد الملك هى حسب اعتقادى :- احتمال اتنين: تضطر تنفذ الخطة دى وتدور من جديد على المؤهل الاحتياطى ..

س 3 / برأيك فيما تستخدم هذه الضفادع ؟

لو اللى بشترى منهم ده صينى يبقى للأكل اما لو دكتور ممكن عشان يشرحوها في المشرحه و انا أرجح التشريح عشان مين صيني غلبان و كحيانى يجي يشتغل فمصر رجل أعمال مين ده حتى مايقبلش ههههههههه

س 4 /ما رأيك فى الفكرة ، وهل قدمت ليك جديد .. ولا صفحات ع الفاضى ... بأمانة ...؟

انا الصراحة و من واقع شخصيتى العملية و العلمية بحب الشغل و بالذات اللى فيها حركة كتير و طبعا بحب المذاكرة بس يعنى ها مش أوى بس لو في مادة بحبها أعشق المذاكرة دى موت عشان كده أفكار حضرتك ألمت باللى انا بحبه و توافقت مع شخصيتى لذا فأنا ممتن جدا لحضرتك بجد

س 5/أسلوب الكتابة .. هل هو مناسب .. أم لا .. وما هو المناسب ؟

أولا أشكرك جدا على طريقتك في توصيل الفكرة حيث انك أحضرت المشكلة و اقترحت لها حلولا و حلولا بديلة و المشاكل التى قد تتعرض لها ان لم تحل المشكلة الأولى بالحلول المقترحة و حلول للمشاكل الثانية و جهزت لنا أمثلة من الواقع أى -من الآخر كده و على بلاطة- انك لخصت لنا الموضع كله في سطور عدة و بشكل مناسب اشكرك شكرا جزيلا
سقفة يا رجالة للاستاذ المحبوب و المحب الاستاذ وليد

(على فكرة أنا بحسد أخويا انه كان بياخد عندك في الفصل ده محظوظ)



و ماعليش يا استاذ ماعرفتش اجاوب على الاسئلة الاختيارى
ههههههههههههههه

ههههههههههههههههههههههههه شكرااااااااااااااااااا يامحمد

شكرا على ايه فين ردك يا بنى على الموضوع
انت قرأته أصلا
اقرأه كويس و افهمه و رد عليه
انا الحمد لله قرأت كل كلمة فى الموضوع

والله قرأته بس مش كله لانه كبيييييييييييييييييييييير جدا بس والله انا عرفت هو بيتكلم علي اه

كويس و قرأتك كويسة و هتفيدك بعدين بس انا عن نفسي ماحبش أبدا أكروت في القراءة يعنى بقرأ بتأنى و فهم لو في قصة أعيش معاها عشان في الآخر تخرج بأكبر كمية من الفائدة
دى طريقتى في القراءة بحبها موت

ماشي يامحمد

كبير جدا ازاي يعيني



ده انا يا ابني كل اسبوع بنزل اشتري دستة رواياتع الواحدة مش اقل من 200 صفحة وبخلصهم في يومين

وانت تجي هنا تقول طويل جدا


ده حتى اعتبره قصة يا اخي

ههههههههههه

عشان احنا عايزين نهزر




ههههههههههههههههههههههه



loOoOoOoOoOoOoOoOol

هههههههههههه

احنا اسفين جدا


مفيشئس ردود\ جانبية تاني

طيب ما تقريبا كلنا جاوبنا على التيست اللى الاستاذ عملهولنا عشان يشوف احنا قرأنا الموضوع ولا لا
و ناقشنا الموضوع احنا دلوقتى عندنا بريك أو فسحة يعنى هههههههههه
عادى لو عندك حاجة نناقشها هنجبلك فيها أجوبة مثالية و انا و الله اجابتى على موضوع الحب بتاعك كانت كلها من دماغى ماحدش غششنى حاجة ولا غشيتها من عالنت
و احنا مع صغر سننا بس دماغتنا فل ده انا و عبد الملك من مخترعي المدرسة و انا دلوقتى بخلص في اختراع عشان أقدمه للجنة العلمية في السعودية
بس نفسي لو الواد أبو نضارة (عبد الملك) كان ييجي معايا كنا هنعمل شغل فل و مية مية

akhamis_5 كتب:

طيب ما تقريبا كلنا جاوبنا على التيست اللى الاستاذ عملهولنا عشان يشوف احنا قرأنا الموضوع ولا لا
و ناقشنا الموضوع احنا دلوقتى عندنا بريك أو فسحة يعنى هههههههههه
عادى لو عندك حاجة نناقشها هنجبلك فيها أجوبة مثالية و انا و الله اجابتى على موضوع الحب بتاعك كانت كلها من دماغى ماحدش غششنى حاجة ولا غشيتها من عالنت
و احنا مع صغر سننا بس دماغتنا فل ده انا و عبد الملك من مخترعي المدرسة و انا دلوقتى بخلص في اختراع عشان أقدمه للجنة العلمية في السعودية
بس نفسي لو الواد أبو نضارة (عبد الملك) كان ييجي معايا كنا هنعمل شغل فل و مية مية

علفكر انا كات من مخترعى المدرسه برده و كت أول واحد عمل انسان الى

:@: :@: :@: :@: :@: :@: :@: :@: :@: :@: :@: :@: :@: :@:

و قلى أيه ده هتبقى عالمى ياض ولا ايه

هههههههههه مش عارف ليه يا محمد كلامك .....