رداً على موضوع العضوة Miss Wounds

علشان موضوع العضوة Miss wounds أخد حيز كبير من التفكير والتحقيق والردود

قررت بفضل الله أنا أتناول الموضوع من عدة زوايا

وربنا يسار

الحلقة الأولى

العلاقات العاطفية . . . (1)- أصل الحكاية

العلاقات العاطفية : رؤية واقعية .. وحلول عملية

(1)- أصل الحكاية

أكتب . . ما اكتبشى .. أكتب . . ما اكتبشى . .
أخيراً . . . هأكتب

كان قدامى أكتر من فكرة عملية عشان أختار منهم واحدة .. المهم فى النهاية ربنا وفقى لاختيار فكرة "الشفرة السّرية Secret Code" وهى فكرة عملية ظريفة جداً جداً.. وبعد ما كوّنت ملامح الفكرة الأساسية وبدأت أعد فيها ... ترددت مرة تانية فى فتح الموضوع الخطير ده موضوع العلاقات العاطفية بين الشباب والبنات.. وبعد تفكير عميق قلت لنفسى: يا واد يا أبوالسباع إنتا عامل السلسلة دى ليه؟ .. ورديت على نفسى: عشان الشباب ومشاكل الشباب بلغة الشباب ومن واقع الشباب؟! والموضوع ده هوا من وجهة نظرى –الصحيحة طبعا - هو المشكلة الأساسية عند (معظم) الشباب .

ياللا زى بعضه . . .

عارف إن المواضيع دى .. بطرحى ليها بالشكل ده .. مش هايعجب ناس كتير .. ومنهم ناس غاليين عليا أوى وبحترم أفكارهم ووجهات نظرهم .. لكن طالما أنى فى إطار الشرع ولم ولن أتعدى حدوده إن شاء الله.. فالموضوع لا يتعدى وجهة نظر .. وحرية الرأى ووجهات النظر مكفولة لكل البشر .. طالما أنها محاطة بسياج كبير من الخارج وهو الشرع.. ومن معه الدليل فليأتنى به... وشكرا لكل الناس .. وبالأخص اللى مش راضيين عن الكلام ده.. وياللا ندخل فى الكلام.

ليه (الحب) هوا المشكلة عند كل الشباب ؟

ياسلام يا عم الرومانسى .. انتا خلاص خليت كل مشاكل الشباب فى الحب والكلام ده .. أمال فين مشاكل الشغل؟ وفين مشاكل العيشة؟ .. ياريت يا خويا الواحد يكون فايق ورايق عشان يحب ويعيش اللحظة .. لكن فين هوا الوقت للكلام ده؟!! ... وأديك شايف العيشة واللى عايشينها والدنيا زى (الفل) ازاى؟... بص يا سيدى .. أولاً: أنا ما قلتش إن المشكلة دى هى (كل) مشاكل الشباب بدليل إن أول فكرة كنت باتكلم فيها عن (المؤهل الاحتياطى) لأنها فعلاً مشكلة .. ومشكلة كبيرة كمان.. ثانياً: أنا بقول إن المشكلة دى هى (أهم) مشاكل الشباب وهاثبتلك كلامى بأدلة من أرض الواقع زى ما اتعودنا مع بعض..

1 - اسأل نفسك: فين دماغك ؟

رايحة مشوار وجاية بعد شوية !!! ... إيه يا عم السؤال الغريب ده .. يعنى إيه فين دماغك يعنى؟.. يا عم اصبر شويه الله يكرمك.. كل اللى أقصده إن لو شاب مننا اتكلم مع صاحبه وفضفض معاه وقالوا: "يا أخى والله الواحد الأيام دى بعيد عن ربنا أوى ومش عارف أعمل إيه مع المعاصى .. ده حياتى كلها بقت معاصى!!".. صاحبنا أول ما يسمع أو حتى (يشم) بس كلمة (معاصى) دماغه هاتروح تلقائى وعلى طول لحاجة معينة.. لو بنت بتشتكى لصاحبتها عن إنها بتعصى ربنا كتير .. دماغ صاحبتها هتروح ع طول لشىء معين.. وأنتم كمان دلوقتى دماغكم راحت لنفس الحاجة دى.. وأتحدى لو واحد دماغه ما رحتشى للى راحت ليه دماغى أنا كمان.. صح ولا غلطان ؟ ... دى أول نطقة.

2 - فهم جميل وحلو .. ولكن

غض البصر ... كلمة بسيطة وكلنا عارفينها ولو قلت لأى واحد فينا يعنى إيه غض البصر هايقول على طول "إن الشاب ما يبصش بصه مش ولا بد على البنت أيا كانت .. والعكس تمام من البنات" ... طبعا هأقولك برافوا عليك .. طيب وإيه دليلك يا بطل ؟.. حضرتك طبعاً راجل (متعلم) و(متنور) و(بتاع مدارس) هاتقولى: "اقرا سورة النور يا أفندى وانتا تعرف.. هتلاقى الآيات (30 و 31) صريحة زى الشمس ومش عاوزة تفسير".. طبعاً أدام سعادتك جبت دليل من القرءان يبقى لازم أشكرك وأحييك وأقولك والله برافوا عليك ...بس.. ده مش كل المعنى المقصود بغض البصر وغض البصر ليه معانى تانى كتيرة غير كده .. يعنى إن عينك مثلاً ما تبرقش فى عربية واحد صاحبك وتقول "يا بن الإيييية.. اداى الناس اللى عايشا بصحيح".. ما ده محتاج غض بصر .. إن الواحد يحسد ويحقد على خلق الله.. ما ده برضه محتاج لغص بصر.. أيوة.. هتقولى زى ما قلتك وفين دليلك يا عم المثقف؟.. هاقولك الدليل فى آخر (ربع) فى سورة القصص وفى أدلة كمان كتيرة جداً من الكتاب والسنة على كلامى ده ...
ومحدش أحسن من حد....
وكتير مننا أكيد فاهم زى صاحبنا ده ..

3 - حلم كل شاب وفتاة ....

لو سألت أى شاب انتا بعد الكلية هاتعمل إيه؟.. إن ما قالشى هاتجوز .. هايقول هاشتغل ... عشان أتجوز.. أو هسافر وأكون نفسى... عشان أتجوز .. وبالنسبة للبنت متهيألى معروفة إن حلم أى بنت إنها تتجوز بابن الحلال اللى يصونها ويحفظ عليها دينها وكرامتها ...

4 - خرّابات البيوت . . وإعلام على واحدة ونص

اللى قرأ المقال بتاع الكاتب المخضرم (صالح فاروق) اللى بعنوان (خرابات البيوت) هايعرف الكلام ده كويس .. الإعلام فى ايامنا دى كل همه إن يفسد أخلاقنا وقيمنا وكل تركيزه الناحية الجنسية .. يعنى معظم الأفلام وحتى المسلسلات بتلعب على الناحية دى .. ناحية الجنس والعلاقات الخاطئة بين الجنسين بحجة إنو الحب الطاهر .. طاهر قال ؟!!.. وكل ما الفنانة (تخلع) أكتر كل ما تتشهر أكتر.. كل ما يكون الفيلم فيه مشاهد ساخنة وقلة أدب يحقق أعلى أرباح ...

وبعدين يا صاحبى دا مش عيب ولا حرام

عارف إن (الشهوة والغريزة الجنسية) فى الشباب والبنات (فطرة).. أدام (الشهوة) فطرة يبقى مش عيب.. وأدم مش عيب يبقى ليها حل.. وأدام ليها حل .. يبقى الإسلام هو الحل .. وهنا السؤال: ازاى الاسلام حل المشكلة دى بطريقة عملييييييية ؟
وهيا دى فكرتنا إن شاء الله تعالى..

سؤال: الفكرة جَت لى منين ؟

محدش يقراها (جِت – لى) عشان فى فرق كبير بين الاتنين .. المهم .. أقولكم جت لى منين ؟... مسألة (الحب) دى.. بعض المشايخ والوعاظ بيتحرج يتكلم فيها.. أنا شخصياً ما قابلتش حد كتير من المشايخ بيتكلم فى الموضوع ده.. واللى بيتلكم فيها.. للأسف مش بيكون قريب من الشباب ومش عايش على أرضهم.. وحتى لو اتكلم الشيخ فى المسائل دى .. تلاقيه بيتكلم فى وادى والمشكلة الحقيقية فى وادى تانى خالص.. تلاقيه بيتكم عن الحكم الشرعى للحب قبل الزواج.. وعن ضوابط العلاقة بين الرجل والمرأة فى الإسلام .. وطبعا ده كلام محترم جداً جداً جداً ومدحش يقدر يقول حاجه عنه .. بس مش هيا دى المشكلة الحقيقية.. هوا ده بالضبط اللى هانتكلم فيه مع بعض بمنتهى الصراحة والوضوح ..

سمير الحبٍّيب وعم سيد الغريب

سمير الحبيِّب عنده مشكلة خاصة ومسكوف يحيكها مع حد .. بس هوا حاسس إنو ماشى فى سكة غلط وما ترضيش ربنا .. عشان كدا سأل سمير الحبيِّب عن واحد يكون بيعرف ربنا عشان يفضفض معاه .. دللوه على راجل متدين ومحترم وبيعرف ربنا اسمه عم سيد الغريب .. راح سمير الحبيِّب لعم سيد الغريب وقاله: "والله يا عم الشيخ أنا مش عارف أبدأ ازاى ؟" .. عم سيد الغريب بابتسامة عريضة: "اتكلم يا حبيبى على طول .. دا أنا زى والدك تمام" .. سمير أخذ نفساً عميقاً وازدات ضربات قلبه مع حمرة ملحوظة علت وجهه الوسيم وقال: "من الآخر يا عم الشيخ أنا بحب واحدة .. وهيا كمان بتحبنى.. وعايشين مع بعض قصة حب حقيقية..".. عم سيد وقد بدأت إبتسامته تزول شيئاً فشيئاً قائلاً: "طيب ما تتجوزها يا بنى ع البركة".. سمير: "ما هيا دى المشكلة يا عم الشيخ .. أنا ما ينفعش أتجوزها لأنى لسا طالب وهيا كمان ..بس والله يا عمى الشيخ أنا بحبها حب طاهر وما فيهوش أى حاجة وحشة خالص .. يعنى ما تفهمشى غلط .. وبصرحة يا عم الشيخ أنا مابعرفش أنام إلا لما اسمع صوتها .. وحتى لما اسمع صوتها برضه ما أعرفش أنااااام" .. تلاشت تماماً إبتسامة عم سيد الغريب مع آخر حروف الشاب الوسيم وقال له غاضباً: "يا حبيب قلبى .. بتحب يا عينيا وانتا لسا طالب ؟!!!!!!.. طيب لما تبقى راجل وتصرف على نفسك الأول!!!!! .. ياللا غور من وشّى ... جاتكم البلا مليته البلد... و تييييييييييييييت".

سمير يفضفض مع النت

عشان كده الشاب بقى بيتكسف يتلكم فى الحاجات دى .. وإن اتلكم ... يتكلم من (وراء حجاب).. وأخيرا لقى النت والشات مخرج من اللى هوا فيه .. لأن بكده ما حدش شايفة وبالتانى يقول اللى هوا عاوزه وباسم مستعار ومش بتاعه.. وطبعا ما اسموش (باعث الأمل) ... 
واحنا بننصح (سمير) وكل (سمير) إنو يكون معانا ويشاركنا فى سلسلتنا دى .. وإن شاء الله هانستفيد من بعض

أول حاجة: لازم نكون (صراحا) مع بعض

لو العيان مثلاً خبّى على الدكتور بتاعه الحاجة اللى حاسس بيها بالظبط .. طبعا الدكتور مش هايعرف يوصف له الوصفة المظبوطة .. عشان كدا يا جماعة لازمن نكون صرحا مع بعضينا شوية .. مش عاوزين نقع فى نفس اللى وقع فيه بعض المشايخ .. المشكلة فى وادى وهما بيتكلموا فى وادى تانى ... وكمان عشان يكون لكلامنا معنى وإلا فبلاش منه خالص إذا كان هايقول نفس الكلام اللى اتقال قبل كده ومعروف عند كل الناس... وبرضو مش معنى كدا إنى أنا دكتور .. لأ..لأ .. كلنا هانتحاور ونتناقش فى المواضيع دى بصراحة.

لازم تكون (مقتنع) ودى تانى حاجة

عشان نعرف نتعالج صح .. (لازمن) و(حتما) و(لابد) إننا نعرف ونعترف إن الحب فى غير مكانه شىء غلط ومش مظبوط.. دى أهم حاجة .. لأنك لو مش مقتنع هايكون الكلام كله فى الهوا وما لوش أى لازمة... يعنى لازم تكون مقتنع إنك مريض ومش قادر تقاوم المرض .. لأن الشىء فى غير مكانه يبقى مرض ومحتاج لعلاج .. ماشى يا عم العيان .. تصدق صعبت عليا..

المرة الجاية إن شاء الله

المقال الجاى هانتكلم فيه عن أصل الحكاية ... وازاى الواحد بيحب .. وإيه احساس الحبيبة .. وازاى الشعور ده مش بايدن الواحد ... وهانشوف مع بعض إيه الحل .... طبعا الإسلام هو الحل .. بس هانعرف إيه هوا حل الإسلام بطرق عملييييية زى ما اتعودنا .. يعنى المقال الجاى للناس الحبيبة بس ...
أيوه .. للحبيبة وبس ..
وأنا عارف إن الدنيا كلها هتقراه عشان الكلمة دى ... آه يا بلد 

===============

ملحوظة: قصة سمير الحبيب والشيخ سيد الغريب هى من تأليفى .. ولا أقصد الإساءة إلى أى شخص فى المقال ولكن لتوصيل الفكرة وهذا ما عاصرته فعلا مع شباب كتير..

الأسئلة :
أجب عن الأسئلة الآتية بضمير:
س 1 / إيه رأيك فى طرح الموضوع الخطير ده للحوار فى سلسلة أفكار للحوار ؟
س 2 / هل رجعت إلى الآيات المذكورة فى المقال ... بأمانة ؟
س 3 / أكمِّل فى الموضوع ده .. ولا أرجع للشفرة السرية (Secret Code) أحسن من وجع الدماغ ده؟

أسئلة كل مرة ...
س 1 / إيه رأيك فى أصل الحكاية .. وهل قدمت لك جديداً ؟

س 2 / بصراحة ..قريت الأفكار اللى فاتت (المؤهل الاحتياطى)

مساهماتى : 358

الحمد لله إنى مش بأعرف أكتب
بس أهم من دا كله إنى نجحت فى تحريك أمر من الامور الراكدة فى المنتدى
وفى معظم المنتديات الدينية
اللى الكل بيخاف يتكلم فيها عن هذا الامر

الى الامام يا استاذ وليد(ربنا يعينك)

عمرى : 29 مساهماتى : 6144

حلو جدا جدا جدا جدا يا استاذ

بس انا عنته في ملف ورد وهقرأه كمان 8 سنين

ان شاء الله لو عشنا يعني

!!!!!!!!!!!!

فين الرد على الموضع

طيب

فين اجابة الاسئلة

يا ناس

يا هوا

عمرى : 29 مساهماتى : 6144

انا مقرأتوش اصلا

انا قلت كمان 8 سنين

خليهم 7 عشان خاطرك يا استاذ

يا سيادة العضو أحمد

لازم حتى وان كنت صغير لسه

بس أنت بتشوف ناس جانبك ويمكن يكونوا أقاربك بيعملوا حاجات زي دي

علشان أنت ممكن تقدم النصيحة لهم

هاتقدمها ازاي والموضوع في الأرشيف

على العموم أنا هاقابل سمير على الشات قريباً

يا ريت تنتظر المفاجأة

مساهماتى : 358

س 1 / إيه رأيك فى طرح الموضوع الخطير ده للحوار فى سلسلة أفكار للحوار ؟

المشكلة إن الكل بيهرب عند الحديث عن الموضوع ده
مع إنه بيمس كل شخص فينا من الداخل
ولكن عند المواجهة
بتلاقى كأن شيئا لم يكن وبراءة الاطفال فى العيون

الفكرة جميلة
بس لو إتنفذت

س 2 / هل رجعت إلى الآيات المذكورة فى المقال ... بأمانة ؟

نعم الحمد لله

س 3 / أكمِّل فى الموضوع ده .. ولا أرجع للشفرة السرية (Secret Code) أحسن من وجع الدماغ ده؟

إستمر ربنا يعينك ويوفقك والكل يشارك

س 1 / إيه رأيك فى أصل الحكاية .. وهل قدمت لك جديداً ؟

أصل الحكاية معروف
ولكن الجديد تقبلها من الجميع وكمان كيفية تقديمها

س 2 / بصراحة ..قريت الأفكار اللى فاتت (المؤهل الاحتياطىالحمد لله
وإلى الامام

منتظرين باقى السلسة

عمرى : 29 مساهماتى : 6144

انا اكبر واحد يا استاذ

وعلى فكرة هي مش حكاية استخفاف زي ما انا فاهم من رد حضرتك

يعني مثلا انا كل يوم سبت بروح اشتري كتب

لاكن مش معقول اروح في مرة جايب كتاب عن المصارعة !!

لأن انا غالبا باشتري روايات ..

صح ولا ..

ماشي يا عم العضو

أنا مش عارف ليه حاسس ان انت مضطهدني

يعني كل ما أكتب حاجة ألاقيك فيها

مساهماتى : 358

الكلاد ده مجه لمين تحديدا؟

لان لو أنا
أنا مش هاقبل أن يتم توجيه لكلام لى وكأنى نكرة

عمرى : 29 مساهماتى : 6144

نكرة ايه بس

الكلام ميوصلش لكده ابدا

غير انه موجه ليا انا

على فكرة يا استاذ

انا تقريبا اصغر واحد في المنتدى ده

عمرى : 30 مساهماتى : 10257

ليه يا عم انت عندك كام سنة وداخل سنة كام ؟
وبعدين بص يا عم احمد الناس فكرة ان الناس الى دخلة اولى ثانوى مش بتعمل حاجة والناس الى فى كلية هما الى مظبطين الدنيا لكن ده فيه مصايب بتحصل خصوصا فى اسكندرية طنطا محترمة شوية

عمرى : 29 مساهماتى : 6144

انا في اولى اعدادي يىا عبدو

عمرى : 29 مساهماتى : 3908

طاب كويس انا في 3 أعدادى
و موضوع الاحترام ده في كلم مكان في حجات وحشة بس في طنطا فعلا المكان نظيف و مابنسمعش عن حاجات وحشة فيها كتير بس على طنطا اسكندرية ممكن تلاقي

احم احم نرجع للأسئلة
الصراحة كنت متردد أرجع بس فضلت أرجع أرجع أرجع لحاد ما خبطت في الحيطة هههههههههه
احم
س 1 / إيه رأيك فى طرح الموضوع الخطير ده للحوار فى سلسلة أفكار للحوار ؟

مش هتفرق أوى بالنسبة للى متابع الموضوع بس اعتقد انها هتبقى أحسن

س 2 / هل رجعت إلى الآيات المذكورة فى المقال ... بأمانة ؟

أمال اتأكد ازاى الحمد لله رجعت بس مالاقيتش مكان أرجع فيه أصلى لازق في الحيطة ههههههههه

الآيتان الـ30 و الـ31 :-
"قل للمؤمنين يغضوا من أبصارهم و يحفظوا فروجهم ذلك أزكى لهم إن الله خبير بما يصنعون * و قل للمؤمنات يغضضن من أبصارهن و يحفظن فروجهن ولا يبدين زينتهن إلا ما ظهر منها و ليضربن بخمرهن على جيوبهن و لا يبدين زينتهن إلا لبعولتهن أو ءابائهن أو ءاباء بعولتهن أو أبنائهن أو أبناء بعولتهن أو إخوانهن أو بنى إخوانهن أو بنى أخواتهن أو نسائهن أو ما ملكت أيمانهن أو التابعين غير أولى الإربة من الرجال و الطفل الذين لم يظهروا على عورات النساء و لا بضربن بأرجلهن ليعلم ما يخفين من زينتهن و توبوا إالى الله جميها أيهَ المؤمنون لعلكم تفلحون * " سورة النور الأية(31/30)

الأيتان 79 و 80 :-
"فخرج على قومه في زينته قال الذين يريدون الحياة الدنيا ياليت لنا مثل ما أوتى قارون إنه لذو حظ عظيم * و قال الذين أوتوا العلم ويلكم ثواب الله خير لمن ءامن و عمل صالحا و لا يلقاها إلا الصابرون*" الأية (80/79) سورة القصص

س 3 / أكمِّل فى الموضوع ده .. ولا أرجع للشفرة السرية (Secret Code) أحسن من وجع الدماغ ده؟

خليك في وجع الدماغ ده ولما تخلصه ابدأ في الشفرة السرية اللى مش عارف بتاعت ايه

أسئلة كل مرة ...
س 1 / إيه رأيك فى أصل الحكاية .. وهل قدمت لك جديداً ؟

حضرتك و الآنسة هدير اخترتم موضوع ماحدش كان يتجرأ انه يكتب فيه لانه موضوع حساس جدا و ممكن أى خطأ ترجعنا لنقطة الصفر و تصعب الموضوع علينا أكتر لان المريض بهذه النوبة القلبية (باحساسى انا أو يعنى بمعتقداتى) هيزيد عنده القناعة فى اللى بيعملوا ربنا يوفقك لكل خير و منتظر الجزء تانى على أحر من الجمر

س 2 / بصراحة ..قريت الأفكار اللى فاتت (المؤهل الاحتياطى)

طبعا......و رديت عليها كمان

عمرى : 29 مساهماتى : 3908

miss wounds كتب:: الكلاد ده مجه لمين تحديدا؟

لان لو أنا
أنا مش هاقبل أن يتم توجيه لكلام لى وكأنى نكرة

معليش يا آنسة بس انا حاسس كده انك لامؤاخذة حساسة شوية و بتاخدى كل حاجة على خطرك يا ريت تخلى الحياة فريش ليه يعنى من حاجة بسيطة تعتبرى نفسك نكرة في وجة نظرنا انا عن نفسي بحترمك جدا و بحترم آراءك و هو ده اللى سارى مع جميع أعضاء المنتدى المحترمين
ياريت ماتزعليش عشان كده انا حاسس ان انت مش هينفع تقعدى على كرسي الاعتراف أبدا ههههههههه لانك بالشكل ده ممكن تزعلى من سؤال ولا حاجة
خليك فريش
الحياة حلوة
أمال ايه مواضيع الحب و الحياة مبنية عالحب و الحب أساس الحياة ما الحب مبنى برضه على التسامح و لو انت ماعشتيش اللحظة دى أدعوكى انك تجربيها مع أبوك مع أمك مع جدك جدتك و انت جامعية حسب ما انا شايف فى المهنة و احتمال تكونى مخطوبة عيشي اللحظة مع سيفن أب قصدى عيشي اللحظة مع ربنا مع الرسول هو ده الحب الحقيقى و اللى يفضل معاكى حتى يوم القيامة حتى تدخلى الجنة كمان ان شاء الله