جمهورية حلمنكوشي (( مقتبس باحتراف ))

يا نهار اسود
ولا واحد عايز يقراه
ماشي

ادي دقني لو كملت من غير ردود

هدى نفسك بس يا حمادة

حراااااام عليك


انت مقريتش الموضوع اساسا

انا قرأته كله
يعنى المختصر بيقول ان فى دكتور فى الجامعة غلط فى اسم الريس واترفد وقعد عالقهوة وفجأة لقى الريس متنكر وقاعد جنبه عالقهوة وطلب منه خدمة
ها كمل انا قرأته كله اهو ياريس

مختصر الفصل ده ان الريس اتزنق فى الدكتور ده عشان هو الوحيد اللى كشفه و طلب منه انه يعرفه مشاكل الشعب و طلباتهم عشان يعرف يوعدهم و التزوير يبقى محبوك

((عشا تعرف انى بقرأه كله بس))
ها كمل
بس الصراحة بيوتيفول طحن

والمقدمة فييين
الفصل مش مهم دهي حلقة القصة قصة دلوة مش مذكرات شخص يا باشا
وهكمل على الصفحة التانية ان شاء الله

انا قصدى يعنى مختصر الجزء ده من القصة بتاعتك

اوكي

بس هي مش بتاعتي

ههه

هو انا معدلها كتير
اصل الموضوع عبارة عن فكرة

بجيب قصص واخليها مبنية على الاساس ده

زي فيلم الاسد الملك او سيمبا
دهي نفسها مسرحية هاملت لشكسبير بس لو كان ابطالها اسود

ماشي يا عم المثقف ماشي
انا نفسي اشوفك بس وبعد كده هعرف اذا كنت فعلا عارف الحاجات اللى بتقولها سواء هنا او فى مواضيع تانية من قبل كده او انك بالصدفة شفتها او بتبحثت عنها

انا عمري
شوف عمري

ما قلت حاجة انا من اسبوع مكنتش عارفها

عمري كده

خلاص ياعم انت هتتنطط

انا اتنطط فعلا

ههههههه

مش معقووول ولا واد رد غير محمد

ليه عني هو الموضوع زبالة ولا ايه

طبعاً
سلعوة جاب الشاى وهو متوجس خيفه احسن ما يطولش ثمنه وممكن يطلع الضيف اللى
معايا زيى ويبرشط على القهوه وقعد يبص لى من فوق لتحت ولكن اول ما فخامته
طلع ورقه بميت سفروت مرسوم عليها صورة فخامته وناولها لسلعوة وقال له
-خد يا سلعوة الكلب .. وخلى الباقى علشانك
طبعاً
سلعوة كان ناقص يرقص ..دى اول مره يطول منى او من ضيف معايا فلوس من زمن
وطبعاً ما خدش باله من كلمة سلعوة الكلب على أساس أنه إتلهى فى الفلوس ولو
كان فخامته قام رزعه كفين ما كانش بردو هاياخد باله .. صحيح ناس تعبد
الفلوس
وبعدين
سعادته ما كانش يقصد يهزأ سلعوة لما قال له سلعوة الكلب , كل ما فى الأمر
إن فخامته فهم لما أنا نديت على سلعوة وقلت له يا سلعوة الكلب أن الكلب ده
لقب العيله بتاعته .. هو يعنى سعادته هايسمع الكلام القبيح ده فين وهو
منفض دماغه من الشعب الغجرى قليل الأدب ده
المهم سعادته لسه بيشد اول نفس من كباية الشاى إلا وقام تافف اللى شربه ورمى الكباية على الأرض وصرخ فى
-إيه القرف ده ؟ إنتم حاطين سم فى الشاى ده ولا إيه ؟؟
طبعاً
قلبى وقع فى الشراب .. يا سنه سوخه .. يكونش العالم هنا فقست فخامته
وحطوله سم فى الشاى .. يا نهار مش معدى .. شرفنا على حبل المشنقه والحمد
لله
ولكن فخامته كمل كلامه وهو فى منتهى الإشمئزاز
-إيه الشاى ده .. جايبينه منين ؟؟
-لا
مؤاخذه يا فخامتك ... أكيد وحل البرك ده عمل شاى من بتاع التموين اللى
بيسرقوه من الدعم , حكم دول عالم ما عندهاش دم , وعاملين شاى للناس اللى
بتدفع طوالى وشاى تانى بتاع التموين للناس أمثالى من المبرشطين
-شاى تموين ؟؟ هو ده شاى التموين المدعم اللى بنقدمه للشعب ؟؟ بس ده مش شاى أصلاً
-لا يا ريس ده أحلى شاى ممكن يتشرب .. هو بس سعادتك لسه ما إتعودتش عليه .. ده كفايه إنه من عند الحكومه الرشيدة بتاعة فخامتك
بص لى فخامته بشك وقال لى
-إحنا مش إتفقنا تتكلم بصراحه من غير نفاق ولا خوف ؟ ولا عايزنى أسحب الأمان اللى إدتهولك ؟؟
-لا
يا فخامتك .. ما تآخذنيش .. بص فخامتك , شاى التموين ده بقى سعادتك عباره
عن 10% شاى درجه تالته . نخالة الشاى يعنى والـ 90 % الباقيه عباره عن
نشارة خشب مصبوغه بصبغة الجزم
إنتفض فخامته مز(( المفلوض ذ بس تقول ايه في الجهل بقى )) عوراً وقال
-يا
نهار أبوكم زحل .. وأنا مسكت الكباية دى بإيدى وحطيتها على بقى .. إنتم
عايزين تسمونى يا كلاب .. أنا هاسحلكم كلكم .. أنا هاولع فيكم يا متآمرين
يا عملاء
-أقعد بس فخامتك وبلاش تزعق أحسن الناس تاخد بالها .. هو يعنى سلعوة الكلب ده كان يعرف إن فخامتك اللى هاتشرب الشاى ده ؟
هدى شويه فخامته وقال
-ماشى
.. ماشى ,, يعدى اليوم ده بس وبعدها يحلها ربنا ... منه لله ( زعلوط
الهباش ) اللى شار عليه الشوره المنيلة دى .. والله لأشرده هو عياله .
-إلا مين زعلوط الهباش ده يا فخامتك
-وإنت مال أهلك انت يا ابن المدايقة .. ما تخليك فى حالك
طبعاً
بلعت لسانى وكشيت جوه ( الزاكته ) السينييه بتاعتى أكثر ما أنا كاشش _ من الشتيمة المدهولة دي _ وفضل
سلعوة رايح جاى حوالينا يعرض خدماته ويسأل المعلم إذا كان عايز حاجه ..
طبعاً فخامته هشه زى ما بيهش ناموسه عماله تزن حواليه بعد ما حلف ما يحط
حاجه فى بق سعادته لحد ما يروح .. وبعدين سألنى سعادته
-إيه حكاية معلم دى ,, ؟؟
-يا سعادتك _ برده يا حفيد سعادته زي لاجازء التانية _ ده نظام تخفى .. ما هو مش معقول أقول سعادتك وفخامتك قدام الناس .. طبعاً هايهرشوك في ظهرك ويكبوا جردل المية _ مية النار _ ويتعرفوا عليك
-طيب قولى إنت إسمك إيه بدل ما انا عمال أقولك يا جربوع كده
-أنا خدام ف(ـخـ)امتك , أبو حلموس المتعوس
-متعوس .. ها ها ها ها إنت إسمك متعوس .. ها ها ها ها ها
-يعنى هو زعلوط اللى ما شاء الله قوى
-إنت بتقول إيه يا جربوع إنت ولا متعوس ولا اى مصيبه ؟؟
-أبداً فخامتك . انا بس بقول لفخامتك أن متعوس ده مش إسم ده صفه

وللحديث بقية لو ما شرفناش فى المديريه اصل التشيبة مستنية
_ اوضة الفران _ هه

[/center]

ههههههههههههههههههههه
جمييييييييييييلة جدا
ما الريس متعود عالسراير السوسات و المخدات ريش النعام و الأكل بالزيت الدايت -لو كان فى زيت كده- و الشاى مش هنتكلم عليه طبعا مستخرج من نبات التوت مش نبات الشاى

I'm Free كتب:

ههههههههههههههههههههه
جمييييييييييييلة جدا
ما الريس متعود عالسراير السوسات و المخدات ريش النعام و الأكل بالزيت الدايت -لو كان فى زيت كده- و الشاى مش هنتكلم عليه طبعا مستخرج من نبات التوت مش نبات الشاى

بقولك ايه يا محمد

ايه رايك ابعتلك بقية الحلقات بالميل بما ان مفيش حد غيرك بيقرا

اعمل ايه
؟؟

يلا يا عم الجزء الرابع اهو
تاعبني انتوا والله

هههخ
---

{ 4 }

ما فيش فايده فى لسانك

بص لى الرئيس وقالى بعجب
- يعنى إيه صفه مش لقب ؟
- يا
فخامة الرئيس متعوس ده إسم العيلة الأم لكل شعب سعادتك
(( كالعادة في سري بقول سعادة جدك )) إكتسبوة من ألاف
السنين وزاد معاهم على مر السنين ومش بس متعوس هى العيلة الوحيده فى
دولتنا المباركه فيه عائلات تانيه كتير , , لكن كلها بترجع فى أصولها
لعيلة المتعوس , وأنا واحد من فروع العيلة الأم اللى هى العيلة الأصل
للشعب ده وهى عيلة المتعوس .. هتلاقى مثلاً فيه عائلة المدهوس, وعيلة
المغموس , وعيلة المحموص , وعيلة الملطوش , وعيلة المنهوش .. وكده يعنى
- إيه ده كله ؟ كل دى أسماء عائلات ؟ وإيه الأسماء الغريبة دى ؟
- يا فخامتك ليك حق ما تعرفش الأسماء دى ,, هاتعرفها غزاى وهى عمرها ما ممرت عليك , لكن كل إسم وراه سبب ..
يعنى
مثلاً عيلة المدهوس دى صفة لكل واحد ركب أتوبيس والقطر فرم الأتوبيس ده
وهوواللى جواه أوعيله ماشيه فى الشارع وعربية من بتوع اليومين دول تفرتكهم

أما
عيلة المغموس دول بقى يا فخامته كل اللى رماه حظه أنه يركب عبارة فى دولة
فخامتك والعبارة دى مصيرها معروف وهو إنها بتنغمس فى البحر ساعتها كل اللى
فيها بيبقى مغموس فى مية البحر
نظر لى الرئيس بإنزعاج وقالى
-إيه ده كله إنت جبت الكلام ده منين ؟ أنا دولتى بيحصل فيها كل ده ؟
-هو إنت لسه شفت حاجه يا ريس ؟ ده إحنا لسه فى أول القصيده .
-هو
لسه فى القصيده أبيات ؟ لا كفاية كده إنت أكيد عميل مدسوس علشان تسمم
أفكارى وتشوه صورة حكومتى الرشيده اللى منقيها على الفرازه نفر نفر .. لكن
إسمع . أنا مش ممكن أصدق الكلام ده ؟
-أحب أفكر سعادتك بس بالعهد بتاع الأمان اللى سيادتك إدتهولى
-أيوه أيوه إفتكرت , بس أعمل إيه ولسانك الزفر ده عمال يرمى الكلام ده
-خلاص يا زعيم زى ما تحب ,, بلاش أكمل
-لا لا كمل ,, وأدينى بسمع ,.. هو يعنى الكلام بفلوس
-على
رأى فخامتك ,, المهم يا كبيرنا نيجى بقى لعيلة المحموص , والمحموص دى يعنى
اللى إتحمص فى نار القطارات اللى بتولع ولا فى مسرح بيعرض مسرحيه والنار
ولعت ومالقوش حتى شوية تراب يطفوا بيها النار فالناس جوه إتحمصت
-أعوذ
بالله على لسانك الشؤم ,, ما تفولش فى وشى يا بنى آدم ,, أصلى كنت ناوى
أروح أحضر حفلة بمناسبة ترشيحى لمدة رئاسية جديده , والله ما فاكر هى رقم
كام ,, طيب هو أنا هاعد وأوجع قلبى ليه ؟ ما كفايه الناس بتعد
-ياريس بعد الشر عنك ؟ فخامتك لما بتروح مكان بيكون كل شئ فيه تمام ما تقلقش
-طيب قولى بقى إيه حكاية الملطوش والمنهوش دى ?
-أه ه ه ,, جينا بقى للكلام اللى يزعل .. وده محتاج أمان جديد من فخامتك
-هى سيرة ولا إيه ,, ما خلاص قلت لك إتكلم من غير خوف
-ماشى
يا زعيمنا بس الله يكرمك ما تتعصبش ... بقى يا فخامتك الملاطيش دول بقى
سعادتك هما اللى حكومة سعادتك حطت إيدها فى جيبهم ولطشت السفاريت اللى
فيها
-أنت بتقول إيه يا جربوع إنت ؟ أنا حكومتى نشاله يا جعر يارِمه يا زباله ؟

-أهو
شفت فخامتك بقى أن الكلام هايزعل سعادتك ؟ وبعدين فخامتك لازم تسمعنى
للآخر ,, صحيح الحكومه بتمد إيدها فى جيوب الشعب العدمان وتلطش السفاريت
اللى فى جيبه . بس كله بالقانون وما فيش سفروت واحد من غير إيصال
-أيوه كده يا بنى آدم فسر كلامك ,, ده أنا كنت هاظلم الحكومه الرشيده وأقول إنهم بيظلموا الشعب
-لا
يا زعيم .. ده إسمه كلام بردوا ؟ دى حكومه فخامتك فى غاية الأمانه ,, هو
حد يستجرى يعيب فى حكومة مولانا ,, يعيش مولانا وحكومة مولانا , القصة
كلها فخامتك أن الحكومة المسكينه مش عارفه تجيب فلوس منين علشان تغطى
مصاريفها , وفخامتك عارف بقى الأكل الأبهة اللى بيجيلهم من الجزر اللى
جنبنا بالطيارات بيتكلف ملايين السفاريت , الدنيا بقت نار فخامتك ,
والحنكوش فى حكومة سعادتك من محدودى الدخل بردو ( حنكوش يعنى وزير فى دولة
نهابونيا ) طيب الحنكوش من دول هايغطى مصاريف الحكومه منين .. يقوم حنكوش
الجباية يطبع ورق دمغه وبيع يا واد منك له ولا ييجى حنكوش الولعه يغلى
البنزين وإنشالله يولع الشعب بجاز بدل البنزين ولا حنكوش الميه وحنكوش
الكهربا فيها إيه يعنى لما يغلوا الفواتير شوية على الناس فيها إيه يعنى
لما يكون الراجل اللى كان بيدفع 100 سفروت كهربا ونصهم ميه لما يدفع 500
ولا ألف سفروت ,, هى يعنى الحناكيش هاتأكلهم وتشربهم وتشغلهم الدش كمان
ببلاش
-والله عندك حق يا أبو الحلاميس يا جعر , الحناكيش غصب عنهم فى اللى بيعملوه والشعب مش راحم وما بيبطلش كلام
-شعب نمرود يا مولانا وما يطمرش فيه الطيب
-طيب إيه بقى عيلة المنهوش دى بقى
-إحم .. ما كفاية كده فخامتك ,, فوت بقى العيله دى ..
-ليه إشمعنى دى بقى ؟ كمل يا زفت إنت ولا عايزنى أتحايل عليك
-العفو
يا مولانا , هو أنا أستجرى ... ... بقى فخامتك المناهيش دول بقى اللى
الكلاب نهشت لحمهم والكهربا فرتكت جتتهم وجتتة اللى خلفوهم
-كلاب
؟ , للدرجه دى فيه كلاب ضاله كتير فى البلد , أنا لازم أكلم حنكوش الطرق
والشوارع يسمهم ولا ينفخهم بمنافيخ حنكوشية الأمن العالى
-ها
ها ها , كلاب شوارع إيه فخامتك اللى عايزها تتنفخ .. وبعدين المنافيخ دى
ليها شغل تانى فى حنكوشية الأمن العالى , وبعدين سعادتك الكلاب اللى نهشت
الناس دى كلاب متكلفه ومتدربه وتعرف إزاى تنهش لحم الواحد من دول من غير
ما تقرقش عضمه .. يعنى علشان قضايا التعويضات والذى منه , هى الحناكشيه
العليا ناقصه وجع دماغ , فخامتك الكلاب دى بتنهش اللى يرميه زمانه بين
إدين إدارة تأديب شعب الدوله التابعه لحنكوشية الأمن العالى . ده غير نهش
عرضه وعرض اللى خلفوه كمان بواسطة رجال الأمن الساهرين على حماية أمن
الدولة وتطهيرها من أمثال هؤلاء الرعاع الممولين من الخارج لزعزة الأمن
والأمان فى الدولة , يعنى سعادتك كلهم يستاهلوا , حد قالهم يطولوا لسانهم
ويتكلموا على أسيادهم وأسياد اللى جابوهم , بعيد عنك يا مولانا دول ناس
عايزين الحرق بجاز وبنزين كمان
-جاز
إيه وبنزين إيه ؟ إنت مش عارف لتر البنزين بقى بكام .. كفايه عليهم الكلاب
تنهش أبوهم ونوفر إحنا فى الولعه ... وبعدين إيه حكاية مولانا اللى
ماسكهالى دى ؟ إحنا يا بنى آدم لغينا الألقاب من زمان اللى كانت عامله زى
الطربوش فوق الكلام والناس بطلت تلبس طرابيش من ساعة ما قضينا على الرجعية
فى العهود البائده
-عندك حق يا فخامتك . . . . الثورة المجيده قلعتنا الطرابش , ولبستنا بدالها طُرح وطراطير

وللحديث بقية لو فلتنا من حنكوشية الامن العالى

ههههههههههههههههه
ده ايه الاقسام المتظبطة دى
والله الجزء ده جميل أوى
بس معقول يكون الريس فعلا مش عارف اللى بيحصل فى دولة فخامته
ربنا يهديه وينورله بصره بصيرته لو هو فعلا مش عارف اللى بيحصل بس لو عارف يبقى كفاية ان ربنا يهديه

بس قول يا رب

على فكرة المقالات دي لسا متكتبتش كلها

يعني انا نفسي مش عارف ايه الي هيحصل في الاخر وبترب زيك بالظبط

بس طبعا ببقى سباق يعني انا اري جزئين بعد ده على اساس لو الراجل اتاخر يبقى انا عندي بديل

{ 5 }
ومشينا على رجلينا جوه البلد


قال لى فخامته
-ما تقوم بينا نلف فى البلد شوية . . عايز اشوف الشوارع شكلها إيه والناس عايشه إزاى عايز أتفرج على شعبى ورعيتى
- إنت تأمر يا فخامة الرئيس , تحب نبتدى منين ؟
- مش مهم مكان معين , المهم نمشى فى قلب البلد وخلاص
خرجنا إلى الشارع الرئيسى ومشينا فيه بعض الوقت وفضل فخامته يكلمنى عن مناظر الزباله فى كل مكان وعن الناس المعفنه اللى بترمى الزباله فى الشارع وإزاى ما يساعدوش الحكومه فى الحفاظ على نظافة البلد , فقلت لفخامته
-فخامتك المفروض أن الناس بتعمل اللى عليها وبتدفع رغم عن بوذها مبالغ كل شهر على فاتورة الكهربا ودى مخصصه لجمع القمامه والمفروض إن فيه شركه متخصصه فى كده
-طيب هى يعنى الشركه هاتيجى تخبط على بيبان الناس وتقولهم هاتوا زبالتكم ؟
-ما حدش قال كده يا فخامتك , ولو إن الزبال كان بيعمل كده ودى شغلته مش عيب يعنى , لكن على الأقل تجيب صناديق للناس تحط فيها الزباله وتلتزم بجمعها كل يوم , لكن اللى بيحصل أن الشركات ما بتجمعش غير الفلوس أول الشهر على فواتير الكهربا , لكن لا فيه صناديق ولا فيه عربيات بتلم الزباله , واللى بيقدر بيدفع لزبال قطاع خاص غير اللى بيدفعه للحكومه واللى ما بيقدرش آديه بيرمى فى الشارع , يمكن الشركه تحس شوية وتيجى تلم الزباله دى
-أهو إنتم كده , شعب كوسلى وكل حاجه ترموها على الحكومه . , هى الحكومه هاتعمل لكم إيه ولا إيه ؟
-عندك حق يا فخامتك , ما أنا قلت لك من الأول إن ده شعب رمه ما يطمرش فيه الطيب , شركات نظافه وجبت لهم شركات نظافه . فلوس وجمعتم من الناس شلاليح ( قروش يعنى والسفروت يساوى 100 شلحوح ) بس الشلاليح دى بتجمل عشرات الملاين من السفاريت كل شهر وماله دى شركه تستاهل , وفى الآخر الشعب المأنتخ عايز كمان الحكومه تيجى تشيل له زبالته , مش بقولك شعب رمه وما يستاهل الطيب
-إستنى هنا كده , إيه الزحمه دى ؟ يا خبر أبيض , معقول فيه ناس بالكميه دى
-يا ريس ده طابور عيش ,
-طابور إيه .. طابور عيش ؟ ليه هو العيش شاحح فى البلد ولا إيه ؟
-لا يا فخامة الرئيس العيش مالى البلد وعلى قفا مين يشيل وكل مترين بتلاقى مخبز عيش بلدى وأفرنجى وإشى ساليزون وإشى باتى بان وإشى مش عارف إيه واللى معاه يدفع نص سفروت فى الرغيف بيشترى واللى ممعاهوش يروح يقف فى الطابور
-طيب ما الحكومه بتاعتى مدعمه العيش وبتبيعه بخمس شلاليح , يعنى فى متناول كل مواطن , يبقى ليه يشترو أبو نص سفروت وليه يقفوا بالشكل ده على الفرن ده بالذات , ده لازم الفرن ده عامل عرض وبيدى على كل 10 أرغفه فطيره مشلتته
-ما هى دى الأفران اللى بتبيع العيش المدعم , وبعدين عرض إيه يا فخامتك ؟ إذا كان نصيب كل واحد من اللى واقفين هناك فى الطابور ده من طلعة النهار بيكون عشر أرغفه واللى عنده عيال كتيره بقى ولا حظه الأسود وعده بضيف رزيل راسم على غدا وعايز يجيب عيش أكتر يجيب الطابور ده من أوله تانى بس لما تيجى الرشه
-رشه , , يعنى إيه رشه .. ؟ إنت عليك ألفاظ يا جدع إنت , مش فاهم منها حاجه خالص
-لا مؤاخذه يا فخامتك . أصل دى عدم المؤاخذه لغه أفرانى , يعنى خاصه بالناس اللى مقضيه عمرها واقفه فى طوابير العيش والرشه يعنى الدفعه , لأن الأفران دى بتخبز على دفعات , ولما بتخلص الرشه – قصدى الدفعه الناس اللى واقفه فى الطابور تفضل حاجزه مكانها لحد ما تيجى الدفعه التانيه , بعد ساعه ولا ساعتين ولا تلاته , حسب مزاج الخبازين بقى , وممكن يقولك بعد شويه الدقيق خلص وما فيش عيش النهارده والناس دول بقى ياكلوا بعضهم
-طبعاً لازم الدقيق يخلص , لما كل المنطقه كلها تقف عند فرن واحد بالمنظر ده وباقى الأفران ما فيش حد واقف عندها يبقى الدقيق هنا لازم يخلص
-هاها ها ها ها يا فخامتك ده حال كل الأفران الموجوده فى البلد , سعادتك فاكر أن الفرن ده بس اللى عليه الزحمه دى . سعادتك ممكن ألف بيك على أفران الدعم فى البلد كلها وتشوف بنفسك , وبعدين يا ريت الدقيق كان بيخلص على العيش ما كانش يبقى فيه الزحمه دى كلها , لكن أصحاب الأفران بيبيعوا الدقيق المدعم بعشر أضعاف تمنه للأفران التانيه بتاعة الناس الوحشه الفرافير دول الباتى بان والساكلما واللى ما أعرفش ايه ؟
زعق فخامته وهو ماسكنى من رقابتى
- إزاى يبيعوا الدقيق المدعم فى السوق السودا . ؟ وفين العسس والإنكشاريه ( العساكر والضباط ) علشان يقبضوا على الناس دول
- يا ريس العسس والإنكشاريه قايمين بواجبهم بس فى النهاية كل صاحب فرن بيلبس القضية لعامل من العمال اللى عنده وبيطلع منها زى القمله من راس الأقرع . وبعدين لو حنكوشية الأكل والجرايه ( زى وزارة التموين عندنا ) لو قفلت فرن من دول طيب الناس دى هتجيب عيش منين ؟ وما فيش قدامهم غير إنهم يروحوا على فرن تانى ويبقى الزحمة زحمتين والفرن اللى مش مكفى زحمه واحده تقتكر إنه هايكفى زحمتين .؟؟؟
- بردو إنتم السبب , بقالنا ميت سنه بنقولكم حددوا النسل ما فيش فايده وجبنا لكم وسائل تحديد النسل بشلاليح وما فيش فايده وصرفنا مليارات السفاريت على الإعلانات علشان ننصحكم ونوعيكم وما فيش فايده وعملنا لكم افلام ومسلسلات وأغانى ورقص وطرب علشان تفهموا لكن بردو ما فيش فايده , فالح الواحد فيكم يتجوز أرنبه كل تسع شهور تولد له عيل وأصرفى يا حكومه وأكلى يا حكومه وعلمى يا حكومه وعالجى يا حكومه . . تقولشى الحكومه خلفتكم ونسيتكم
- عندك حق يا فخامتك . هى الحكومه كانت جوز إمنا يعنى ولا كانت جوز إمنا , علشان تصرف علينا بعد ما أبونا مات وشبع موت , هى الحكومه هاتجيب منين سفاريت علشان تغطى مصارفها وكمان تصرف على العالم دى كمان , ده حتى بيقولك فى المثل اللى محتجاه الحكومه يتحرم على الشعب , ما الحناكيش كلهم عندهم ولاد زينا , طيب هما هايصرفوا على ولادهم ويعلموهم برا علشان يتثقفوا ويجيبوا احسن شهادات ولا هايعلموا الشعب الجربان ده , وهما الحناكيش مش من نفسهم بردوا عيالهم يركبوا أحسن عربيات ويلبسوا أحسن لبس وياكلوا أكل نظيف من غير لا إشعاعات ولا سرطانات . . طيب هما هايلاحقوا على إيه ولا إيه ؟ . . طيب تصدق بالله يا فخامتك , والله أنا قلبى بيتقطع لما باسمع عن الحناكيش واللى بيحصل معاهم آل إيه كل يوم والتانى إشى إستجواب وإشى طلبات إحاطه فى حوش الحرافيش ( زى مجلس الشعب عندنا كده ) صحيح أهو كله هجايص فى الآخر ولا عمرنا شفنا حنكوش عبر حد من نواب الحرافيش دول ولا سمعنا عن حنكوش كلف نفسه إنه يجاوب على أسئلتهم , بس بردوا ليه يخنقوهم كل شوية بإستفسارات وإحاطات وإستجوابات , ما يسيبوهم باللى هما فيه , مش كفايه الهم اللى ليل ونهار فيه . إشى حفلات وإشى إستقبلات وإشى كوكتيل فى سفرة مين ولا فرح إبن مين . ده غير الهم والرعب ليل ونهار أحسن البورصه تنضرب ويخسروا المليارات اللى بيضاربوا بيها فى البورصه

وفجأة وإحنا واقفين قدام الفرن بنتفرج على الناس اللى هاتموت بعضها على العيش سمعنا صوت سرينه عربية الإغاثه فسألنى فخامته بقلق
- إيه فيه إيه ؟ السرينه دى علشان إيه ؟
- إهدا يا ريس دلوقتى نعرف
وجت عربية الإغاثه وفهمنا إن فيه جثتين من إمبارح سقطوا شهداء لطوابير العيش وجت النهارده عربية الإغاثه تشيلهم علشان ترميهم فى أى قرافه لأن ريحتهم بدأت تطلع وقالى فخامته فى ذهول
- معقوله . . ؟ معقوله إتنين يموتوا فى طوابير العيش . ؟ ده لازم كان عندهم القلب ولا مرض خطير .. هيييييه أعمار بقى . , بس الغريب إن ما فيش ولا واحد ساب مكانه ولا حتى إتلفت حواليه علشان يعرف فيه إيه
- يا ريس ما هما أكيد إتعودوا على كده , هى دى اول مره يعنى ., وبعدين هو لو ساب مكانه مش هايعرف يرجعله تانى ويبات النهارده من غير عشا ..

وللحديث بقية إن كان فى العمر بقيه

ههههه
روعة

ايه الغيبة الطويلة دى حسين